去濕地公園，港鐵有優惠！

無錢出國去旅行，但係又想周圍去下，其實香港都有唔少旅遊景點，今次介紹既係起天水圍既濕地公園。

宜家港鐵有優惠，起3月15日前，只要搭港鐵去天水圍站，出閘之後仲可以拎張濕地公園門票9折優惠券，唔好以為慳得3蚊雞咁少，因為憑券去濕地公園購票，仲可以有張「輕鐵 /港鐵巴士一天乘車證」，玩完濕地公園順便周圍去，平時單程都要成4，5蚊架！因為本身搭西鐵已經送一程輕鐵，所以個日搭輕鐵係完全唔洗比錢架！
每逢星期六、日，濕地公園內都有好多個導賞團，如果你鍾意聽下故仔學下野，就記得參加啦！

玩完濕地公園，有時間可以去埋起天水圍站既屏山文物徑，主要係睇傳統中國建築，有古廟、宗祠，同香港唯一古塔 - 聚星樓！（其實起天水圍站都望到聚星樓，哈哈！）

至於食野方面，可以去元朗食出名到未食過都聽過既B仔涼粉，想飽肚既話，起屯門至天水圍一帶有好多燒烤樂園，想食得豪氣，可以去流浮山或者屯門三聖食海鮮！

常規優惠

講完濕地公園活動，我地呢班追求至抵既朋友仔又點會淨係著眼於家陣既promote！如果無上面個優惠又點算？其實港鐵仲有張長期都有既「西鐵全日通」，全日任搭西鐵線、輕鐵、港鐵接駁巴士，張飛都只係$20炸！大家可以先用八達通搭港鐵去美孚，出閘之後買張全日通再入閘。如果來回都搭西鐵，未計你搭輕鐵，都會平過你用八達通由港九直入天水圍！去港鐵網站計過，試左五個車站（東涌、柴灣、觀塘、黃大仙、將軍澳），五個都適用於呢條rule架！都咪話唔正！「全日通」出閘唔會收番，可以留為紀念。
另一方面，如果你人數多，10個或以上仲可以起濕地公園買團體飛，都有九折架！計計埋埋，仲抵過家陣個 promote啦！